Мормоны Ном бол бидний амьдралд чиглүүлэг өгч, Есүстэй холбож өгөхийн тулд оршин буй сүнсээр өгөгдсөн судруудын ном юм. Үүний нэр ямар учиртай вэ? Олон зуун жилийн өмнө эртний Америк тивд Мормон хэмээх нэгэн бошиглогч ард түмнийхээ цэдгийг эмхэтгэсэн юм. Тэд бидний адил маш олон сорилт бэрхшээлтэй тулгарч байлаа. Мөн тэд бидний адил Христэд хандах үедээ хүч чадлыг олдог байв.

Мормоны Ном бол Есүс Христийн бас нэгэн гэрээ бөгөөд дэлхийн Гэтэлгэгч, Аврагчийн хувиар гүйцэтгэсэн Түүний тэнгэрлэг зорилгыг өгүүлэх учир үүнийг Библийн хамт унших учиртай юм. Библи болон Мормоны Ном нь хамтдаа Бурханы бид бүгдийг гэсэн агуу их хайрыг илүү сайн ойлгох боломжийг бидэнд олгож, Түүнтэй илүүтэй ойртоход тусалдаг.

Мормоны Ном нь Есүс Христийг Ариун Библийн адил гэрчилдэг. Мормоны Номд цэдэглэгдсэн гол чухал үйл явдал бол эртний Америк тивийн итгэгчдэд сургаалаа тунхаглаж, тохинуулсан Есүс Христийн айлчлал юм. Энэхүү шастир нь Бурхан бүх хүүхдэдээ нэг ижил адислал, боломж олгодог бөгөөд Өөрийнх нь хайр зөвхөн дэлхийн нэг хэсэгт байгаа хүмүүсээр хязгаарлагдаагүй гэдгийг тайлбарладаг. Бидний хэл, гадаад төрх ямар байхаас үл хамааран Бурхан биднийг хайрладаг бөгөөд биднээс Өөрт нь илүү ойртохыг хүсдэг.

Мормоны Номд өгүүлэх мянган жилийн ер бусын түүхийг хураангуйлан авч үзвэл:

Чухамдаа Мормоны Ном бол нэгэн гэр бүлийн тухай түүх юм. Тэрхүү гэр бүлийн эцэг болох Лихай эрт цагийн Иерусалимын бошиглогч байв. Бурхан Лихайд зүүдэнд нь гэр бүлээ авч Иерусалимыг орхин явахыг анхааруулсан бөгөөд учир нь өөр нэг үндэстэн тэрхүү хотыг мөн оршин суугчдыг нь удахгүй эзлэн авах гэж байсан юм. Тэрээр далай гатлан, Америк тивд хүрсэн. Том хөвгүүд нь болох Лэмэн, Лэмүэл хоёр эцэгт нь сүнсний удирдамж ирсэнд итгэхгүй байлаа. Тэд үргэлж гомдоллодог байв. Тэдний дүү болох Нифай гуйвшгүй итгэлтэй байлаа. Бурхан Нифайг гэр бүлээ удирдахаар мөн тэдний багш байхаар сонгов.

Эцэстээ энэ хүмүүс Нифайчууд болон леменчүүд гэсэн хоёр хэсэгт хуваагдсан юм. Ихэвчлэн энэ хоёр бүлэг хоорондоо дайтаж, итгэлийн сорилтод тогтмол орж байлаа. Тэдний итгэлийн түүх Мормоны Номын хуудсуудыг хүчирхэг номлол, бошиглол, амьдралын хичээлүүд, сүнслэг туршлагаар дүүргэсэн юм.

Иерусалимд Есүс амилсныхаа дараа Америк тивийн хүмүүст үзэгдсэн. Тэрээр тэдэнд баптисм, наманчлал, өршөөлийн талаар заав. Тэр тэдний өвчнийг эдгээж, хүүхдүүдийг адисалсан. Тэр Өөрийн Сүмийг байгуулав. Иерусалимд байсан хүмүүсээс ялгаатай нь тэд Есүсийг анхааран сонссон юм. Дараа нь тэд олон зуун жилийн турш амар тайван амьдарсан билээ. Цаг хугацаа өнгөрөхөд тэрхүү хүмүүс итгэлээ алдсан бөгөөд Моронай хэмээх нэгэн бошиглогч тэдний цэдгийг ирээдүйн хүмүүс болох бидэнд хадгалан үлдээхийн тулд газарт булсан юм. Иосеф Смит цэдгүүдийг олохоор чиглүүлэгдэж, Мормоны Номыг Бурханы хүчээр орчуулсан. Өнөөдөр Мормоны Номын сургаалууд Есүс Христэд итгэх итгэлийг нэмэгдүүлж, олон сая хүнд сүнслэг урам өгч байна.

Сүмийн цуглааны цаг цуглаан бүрийн хувьд харилцан адилгүй байдаг. Гэсэн хэдий ч хүн бүрд зориулсан бишрэн шүтэх гол цуглаан, түүний дараа явагддаг хүүхэд, өсвөр үе, насанд хүрэгчдийн ангид оролцох боломж танд хэзээд нээлттэй.

Хүн бүрд зориулсан тэрхүү цуглааныг “ариун ёслолын цуглаан” гэж нэрлэдэг. Уг цуглаан нь дуулал, залбирал, цугларагсдын дундах өөр өөр гишүүний долоо хоног бүр өгөх номлолоос (“буюу “үгээс”) бүрддэг. Цуглааны хамгийн чухал хэсэг нь бид Аврагчийг санан дурсахын тулд ариун ёслолоос (талх, уснаас) хүртэх явдал байдаг.