1 Тэд Иерусалимд дөхөж, Чидун уулын бэл дэх Бетфагт ирээд, Есүс хоёр шавиа илгээж 

2 тэдэнд, Эсрэг талд чинь байгаа тосгонд оч. Та нар тэр даруй уяатай илжиг дудрантайгаа байгааг олно. Тэднийг тайлаад Надад авчир. 

3 Хэрэв хэн нэгэн та нарт юм хэлбэл “Эд нар Эзэнд хэрэгтэй” гэж хэлээрэй. Тэгвэл тэр тэднийг даруй явуулна гэв. 

4 Энэ нь эш үзүүлэгчээр хэлүүлсэн нь биелэгдэхийн тулд билээ. Юу гэвэл

5 "Харагтун, Хаан Эзэн чинь чам уруу даруухнаар, илжиг буюу эдэлгээний адгуусын төл, дудран унаад айсуй гэж Сион охинд дуулга" гэсэн юм. 

6 Тэгээд шавь нар явж, Есүсийн захисан ёсоор гүйцэтгэв. 

7 Тэд илжгийг дудрантай нь авчраад дээр нь дээлүүдээ тохож Есүсийг мордуулав. 

8 Үй олон хүн дээлээ зам дээр дэвсэж зарим нь модноос мөчир огтлон зам дээр дэлгэж байлаа. 

9 Өмнө хойно нь явж буй хурсан олон "Давидын Хүүд Хосанна! Эзэний нэрээр Ирэгч нь ерөөлтэй еэ! Хамгийн Дээдэд Хосанна!" гэж хашхиралдаж байлаа. 

10 Түүнийг Иерусалимд ороход хотынхон бүгд үймэлдэж, энэ хэн билээ? гэцгээв. 

11 Ард олон, Энэ чинь Галилын Назараас ирсэн эш үзүүлэгч Есүс байгаа юм гэж байв.

29 Тэгээд Тэр Чидун хэмээх уулын бэлд байх Бетфаг болон Бетанд дөхөж ирээд, шавь нараасаа хоёрыг илгээж 

 30 Эсрэг талд чинь байгаа тосгонд оч. Тэнд очоод, та нар хүн ер унаж байгаагүй уяатай дудран олно. Тайлаад энд авчир.  

31 Хэн нэгэн та нараас “Та нар юунд уяаг нь тайлна вэ?” гэвэл “Эзэнд энэ хэрэгтэй байна” гэж хэл гэжээ.  

32 Явсан хоёр Түүний айлдсанчлан байгааг олов.  

33 Тэгээд тэд дудрангийн уяаг тайлж байтал эзэн нь тэднээс 

Та нар юунд дудранг уяанаас нь тайлав? гэхэд  

34 тэд—Эзэнд хэрэгтэй байна гэв.  

35 Тэд дудранг Есүст авчирч, дээр нь дээлүүдээ тохсоны дараа Есүсийг мордуулав.  

36 Түүнийг тийн явах зуур хүмүүс зам дээр нь дээлээ дэвсэж байлаа.  

37 Есүсийг Чидун уулын бэлд ирэх үед дагалдан яваа олон түмэн бүгдээрээ өөрсдийн үзсэн хамаг гайхамшгуудын төлөө чанга дуугаар баяртайгаар Бурханыг магтацгааж, 

38 Эзэний нэрээр ирэгч Хаан ерөөлтэй еэ! Амар тайван нь тэнгэрт, Алдар сүр нь хамгийн дээр байх болтугай! гэж байлаа.  

39 Олны дунд байсан зарим фарисайчууд Түүнд—Багш аа, шавь нараа хориоч гэсэнд  

40 Тэр—Би та нарт хэлье. Хэрэв тэд дуугаа хураавал чулуунууд хашхирна шүү гэв. 

 41 Тэгээд Есүс ойртон ирж, хотыг хараад түүний төлөө уйлж 

42 Хэрэв чи ядаж, энэ өдөр юу амар тайванд хүргэхийг мэдсэнсэн бол! Гэвч эдүгээ энэ нь нүднээс чинь далдлагдав.  

43 Дайснууд чинь чиний эсрэг бэхлэлт босгон чамайг бүсэлж тал талаас чинь бүчих өдрүүд ирэх үед  

44 чамайг болон чиний дотор хүүхдүүдийг чинь газартай тэгшлэх болно. Тэд чиний дотор чулууг чулуун дээр нь орхихгүй. Учир нь чам дээрх, Бурханы харгалзлын цагийг чи мэдээгүй юм гэв. 

 15 Тэд Иерусалимд ирцгээлээ. Есүс сүмд ороод, тэнд байсан худалдаачдыг болон худалдан авагсдыг хөөн гаргаж, мөнгө солигчдын ширээнүүд ба тагтаа худалдагсдын сандлыг хөмөрч орхив.  

16 Сав суулга зөөж, сүмээр явахыг Тэрээр хэнд ч эс зөвшөөрөв.  

17 Есүс тэдэнд заан, “Миний гэр бүх үндэстний залбирлын гэр гэж нэрлэгдэх болно” гэж бичигдсэн бус уу? Гэтэл та нар түүнийг нь дээрэмчдийн үүр болгожээ гэв.  

18 Ахлах тахилч нар ба хуулийн багш нар үүнийг сонсоод, Есүсийг хөнөөх арга зам хайж байлаа. Учир нь олон түмэн бүгд Түүний сургаалыг сонсоод гайхаж байсан тул тэд Есүсээс айж байв.  

36 Багш аа, хуулийн аль тушаал нь агуу вэ? гэв.  

37 Тэр түүнд “Чи Бурхан Эзэнээ бүх зүрх, бүх сэтгэл, бүх оюун ухаанаараа хайрла.”  

38 Энэ бол агуу нь бөгөөд анхны тушаал мөн.  

39 Удаах нь “Чи хөршөө өөрийн адил хайрла” гэсэнтэй адил юм.  

40 Энэ хоёр тушаал дээр бүх хууль ба эш үзүүлэгч тулгуурладаг юм гэлээ. 

34 Тэгээд Хаан баруун талдаа байгсдад хэлэх нь “Эцэгээр минь ерөөгдөгсөд өө, нааш ир. Ертөнцийн сууриас та нарт бэлтгэсэн хаанчлалыг өвлөн авсугай.  

35 Учир нь өлсөж байхад минь та нар Надад идэх юм өгсөн. Цангаж байхад минь уух юм өгсөн, харь хүн байхад минь урьж оруулсан,  

36 нүцгэн байхад минь Намайг хувцасласан, өвчтэй байхад минь Намайг эргэж байсан, шоронд байхад минь Над дээр ирсэн билээ” гэхэд  

37 зөвт хүмүүс Түүнд “Эзэн, бид хэзээ өлсөж байхыг тань хараад хооллож, цангахад тань уух юм өгсөн бэ?  

38 Хэзээ бид харь хүн байсныг тань хараад, урьж оруулан нүцгэн байхад тань хувцасласан бэ?  

39 Хэзээ бид өвчтэй байхыг тань хараад, эргэж, шоронд байхад тань очсон юм бэ?” гэх болно.  

40 Тэгэхэд Хаан тэдэнд “Үнэнээр Би та нарт хэлье. Та нар энэ ах дүүсийн минь дорд нэгэнд ийн үйлдсэн бол Надад хийсэн хэрэг” гэж хэлнэ.  

41 Тэгээд Тэр зүүн талд байгсдад хандан “Хараагдагсад аа, Надаас зайл. Диавол болоод түүний тэнгэрэлч нарт бэлтгэсэн мөнх галд ор.  

42 Учир нь та нар өлсөж байхад минь идэх юм өгөөгүй, цангаж байхад минь уух юм өгөөгүй,  

43 харь хүн байхад минь урьж оруулаагүй, нүцгэн байхад минь хувцаслаагүй, өвчтэй ба шоронд байхад минь Намайг эргээгүй” гэж хэлнэ.  

44 Тэд мөн адил “Эзэн, хэзээ бид Таныг өлсөж, цангаж, харь хүн, нүцгэн, өвчтэй, шоронд байхыг тань хараад, Танд үйлчлээгүй юм бэ?” гэх болно.  

45 Тэр хариуд нь “Үнэнээр Би та нарт хэлье. Та нар эдгээрийн дорд нэгэнд ийн үйлдээгүй бол Надад ч үйлдээгүй хэрэг” гэж хэлнэ. 

1 Бетаны Лазар өвчтэй байлаа. Бетан нь Марта, түүний дүү Мариа хоёрын тосгон юм.  

2 Мариа бол Эзэнийг тосоор тослоод, хөлийг нь үсээрээ арчсан тэр эмэгтэй бөгөөд ах Лазар нь өвчтэй байв. 3 Тиймээс эгч дүүс Есүст хүн илгээж, Эзэн минь, хараач, хайрладаг хүн тань өвдөв гэж хэлүүлэв.  

4 Үүнийг сонсоод Есүс, Энэ өвчин үхэлд бус харин үүгээр Бурханы Хүү алдаршуулагдахын тулд, Бурханы алдрын төлөө юм гэлээ.  

5 Марта, түүний охин дүү болон Лазарыг Есүс хайрладаг байлаа.  

6 Лазарын өвдсөнийг сонсоод, Есүс байсан газраа дахин хоёр хонов.  

7 Дараа нь Тэр шавь нартаа, Иудей уруу дахин явцгаая гэхэд  

8 шавь нар нь, Рабби, саяхан иудейчүүд Тан уруу чулуу чулуудахаар завдаж байсан. Та тийшээ дахиад явах гэж үү? Гэв.  

9 Есүс, Өдөрт арван хоёр цаг байдаг бус уу? Өдөр явбал ертөнцийн гэрлийг үздэг тул бүдрэхгүй.  

10 Харин шөнө явбал хүний дотор гэрэл байхгүй тул бүдэрнэ гэв.  

11 Ингэж айлдсаныхаа дараа Тэр тэдэнд, Бидний анд Лазар унтжээ. Гэвч Би түүнийг нойрноос нь сэрээхээр явна гэхэд  

12 шавь нар нь Түүнд—Эзэн, хэрэв унтсан бол тэр эдгэнэ гэв. 13 Есүс Лазарын үхлийн тухай айлдсан ажээ. Харин тэд Түүнийг унтаж амрах тухай ярьж байна гэж боджээ.  

14 Тэгтэл Есүс тэдэнд шуудхан—Лазар үхсэн.  

15 Та нарыг итгүүлэхийн тулд, тэнд байгаагүйдээ Би та нарын төлөө баяртай байна. Харин одоо түүн уруу явцгаая гэв.  

16 Гэтэл Ихэр гэгддэг Томас бусад шавь нарт—Цөмөөрөө бас явцгаая. Тэгээд Түүнтэй хамт үхье гэж хэлэв. 

17 Есүс ирээд, Лазарыг булшинд дөрөв хоног байсныг мэдэв.  

18 Бетан Иерусалимаас холгүй арван таван стадиа орчмын тэртээ байдаг аж.  

19 Ахаасаа хагацсан Марта, Мариа нарыг тайтгаруулахаар олон иудей тэднийд иржээ.  

20 Тэгтэл Марта Есүсийн ирж байгааг дуулаад, угтахаар гарав. Харин Мариа гэртээ суугаад үлдэж.  

21 Марта Есүст—Эзэн, Та энд байсан бол ах минь үхэхгүй байх байсан.  

22 [Харин] Та Бурханаас юу ч гуйсан Бурхан Танд өгнө гэдгийг одоо би мэдэж байна гэв.  

23 Есүс түүнд—Ах чинь амилна гэхэд  

24 Марта Түүнд—Эцсийн өдрийн амилалд тэр амилна гэдгийг би мэднэ гэв.  

25 Есүс Мартад—Амилал ба амь бол Би байгаа юм. Надад итгэдэг нь үхэвч амилна.  

26 Надад амьдрагч хийгээд итгэгч бүхэн хэзээ ч үхэхгүй. Үүнд итгэж байна уу? гэж асуув.  

27 Марта—Тийм ээ, Эзэн. Та бол Христ, ертөнцөд ирэх Бурханы Хүү мөн гэдэгт би итгэдэг. 

28 Үүнийг хэлээд тэр явж, дүү Мариагаа дуудаад, сэмхэнээр—Багш энүүхэнд ирээд чамайг дуудаж байна гэхэд  

29 Мариа үүнийг сонсоод, ухасхийн босож, Түүн уруу очив.  

30 Есүс тосгонд хараахан хүрч очоогүй агаад харин Мартатай уулзсан газраа л байж байлаа.  

31 Тэгтэл гэрт нь Мариатай байж, тайтгаруулж байсан иудейчүүд түүнийг ухасхийн босож гарч явахыг харахдаа, түүнийг булшин дээр очиж уйлахаар явлаа гэж бодоод араас нь дагажээ.  

32 Мариа Есүсийн байсан газар ирж, Түүнийг хараад хөлд нь унаж—Эзэн, хэрэв Та энд байсан бол ах минь үхэхгүй байх байсан гэлээ. 33 Есүс түүний уйлахыг болон түүнтэй хамт ирсэн иудейчүүдийн уйлахыг хараад сүнс нь гүнээ шаналж, дотроо үймрэн 

34 Та нар түүнийг хаана тавьсан бэ? гэхэд тэд Түүнд—Эзэн, ирээд, үз гэлээ.  

35 Есүс уйлав.  

36 Тэгтэл иудейчүүд—Тэр түүнд ямар хайртай байсныг хараач гэцгээж байлаа.  

37 Харин тэдний зарим нь—Сохор хүний нүдийг нээсэн энэ, түүнийг мөн үхүүлэхгүй байж чадаагүй юм байх даа гэв. 

38 Есүс дахиад л дотроо гүнээ шаналж, булшин дээр хүрч ирэв. Энэ нь агуй байсан бөгөөд амыг нь хадаар тагласан байлаа.  

39 Есүс—Хадыг зайлуул гэхэд талийгаачийн дүү Марта Түүнд—Эзэн, тэр үхээд дөрөв хонож байгаа тул одоо өмхийрсөн байгаа гэж хэлэв.  

40 Есүс, Мартад “Хэрэв чи итгэвэл Бурханы алдрыг харна” гэж Би чамд хэлсэн бус уу? Гэлээ. 

 41 Тэгээд тэд хадыг зайлуулав. Есүс дээшээ харан—Аав аа, Та Намайг сонссонд Танд Би талархаж байна.  

42 Та Намайг үргэлж сонсдогийг Би мэдсэн. Та Намайг илгээсэн гэдэгт итгүүлэхийн тулд тойрон зогсох олны төлөө Би үүнийг хэллээ гэв.  

43 Тэр ийн айлдаад, чанга дуугаар—Лазар, гараад ир гэж хашхирав. 

 44 Талийгаач гар, хөл нь оршуулгын боолтоор боолттой, нүүр нь алчуураар ороолттой чигээрээ гарч ирэв. Есүс тэдэнд—Тайлж, түүнийг явуул гэв. 

14 Тэр үед арван хоёрын нэг Искариотын Иудас ахлах тахилч нарт очиж 

15 Түүнийг та нарт барьж өгвөл та нар надад юу өгмөөр байна? гэхэд тэд түүнд гучин мөнгөн зоос дэнслэв.  

16 Тэр мөчөөс эхлэн Есүсийг барьж өгөх аятай завшааныг тэрээр эрэлхийлж эхлэв. 

14 Цаг болоход Тэр тухлан суулаа. Элч нар Түүнтэй хамт байв.  

15 Есүс тэдэнд—Би зовохоосоо өмнө энэхүү Алгасал баярын зоогийг та нарын хамт барихсан гэж ихэд хүссэн билээ.  

16 Би та нарт хэлье. Энэ нь Бурханы хаанчлалд биелэгдтэл Би хэзээ ч дахиж зоог барихгүй гээд,  

17 Тэр аягыг авч, талархал өргөн—Үүнийг авч, дундаа хүртэцгээ.  

18 Би та нарт хэлье. Үүнээс хойш Би усан үзмийн дарсыг Бурханы хаанчлал иртэл уухгүй гэв.  

19 Тэр талх авч, талархал өргөөд, хуваан тэдэнд өгөхдөө—Энэ бол та нарын төлөө өгөх Миний бие мөн. Намайг дурсаж үүнийг үйлд гэж айлдав.  

20 Тийн идэцгээсний дараа Тэр мөн аяга авч, 

39 Тэгээд Тэр тэндээс гарч, дадсан ёсоороо Чидун уул өөд өгсөв. Шавь нар ч Түүнийг дагалаа.  

40 Тэнд ирээд Тэр тэдэнд хандаж—Та нар уруу татагдахгүйн тулд залбирцгаа гээд  

41 тэднээс чулуу шидэх зайтай холдон, өвдөг сөгдөөд ингэж залбирав.—42 Эцэг минь, хэрэв Та хүсэж байгаа бол энэ аягыг Надаас алгасуулаач. Гэвч Миний хүслээр бус, харин Таныхаар болог гэв.  

43 Тэгтэл тэнгэрэлч Түүнд тэнгэрээс үзэгдэн, Түүнийг тэнхрүүлж байлаа.  

44 Тэр зовж, шаналж байсан тул маш шаргуу залбирч байлаа. Түүний хөлс нь цусны дусал мэт газарт дусалж байв.  

45 Тийнхүү залбирсныхаа дараа Тэр босож шавь нар уруугаа очоод, уй гунигаасаа болж унтаж буй тэднийг олж хараад,  

46 тэдэнд—Та нар юунд унтана вэ? Босоцгоо, уруу татагдахгүйн тулд залбирцгаа гэж айлдав. 

 47 Түүнийг ийн ярьж байх зуур, үзэгтүн, бөөн хүн хүрч ирэв. Арван хоёрын нэг Иудас тэднийг тэргүүлжээ. Есүсийг үнсэхийн тулд тэр дэргэд нь ойртон ирэв.  

48 Харин Есүс түүнд—Иудас аа, чи Хүний Хүүг үнсэлтээр барьж өгч байна уу? гэв.  

49 Түүнийг хүрээлэн зогсогсод юу болох гэж буйг хараад—Эзэн, бид илдээрээ цавччих уу? гээд  

50 тэдний нэг нь тэргүүн тахилчийн зарцыг цохиж, баруун чихийг нь тас цавчжээ.  

51 Тэгтэл Есүс—Боль, үүнийгээ зогсоо гээд чихэнд нь хүрч мөнөөх боолыг эдгээв.  

52 Тэгээд хүрч ирсэн ахлах тахилч нар, ахлагчид болон сүмийн түшмэдэд Есүс 

—Та нар Намайг дээрэмчин барихтай адил санан, илд шийдэмтэй ирээ юү?  

53 Өдөр бүр та нартай сүмд хамт байхад минь та нар Надад гар хүрээгүй. Харин энэ цаг болоод харанхуйн хүч нь та нарынх юм гэв. 

54 Тэд Түүнийг баривчлан тэргүүн тахилчийн гэрт хүргэв. Харин Петр алсуур дагасаар очив. 

36 Есүс тэдний хамт Гетсемани гэдэг газар ирж, шавь нартаа—Намайг тэнд очиж залбирах зуур энд сууцгааж бай гээд,  

37 Петрийг бас Зебедеен хоёр хүүг Тэр авч явав. Тэгээд зовж, шаналж эхлэв.  

38 Тэгээд тэдэнд—Сэтгэл минь үхтлээ зовж байна. Энд үлдээд, Надтай хамт сэргэг байцгаа гэжээ.  

39 Тэр жаахан цааш яваад, нүүрээрээ унаж—Эцэг минь, болж өгвөл Надаас энэ аягыг өнгөрүүлээч. Гэвч Миний хүслээр биш, харин Таныхаар болог гэж залбирлаа.  

40 Тэгээд Тэр шавь нар дээрээ ирж, тэдний унтаж байхыг хараад, Петрт—Та нар Надтай ганц цаг ч сэргэг байж чадсангүй юу?  

41 Уруу татагдахгүйн тулд сэргэг бай, залбир. Сүнс чухамдаа тэсэн ядаж байна, харин махбод дорой юм.  

42 Тэр дахин хоёр дахь удаагаа явж, залбиран—Эцэг минь, Би үүнийг уухаас нааш энэ нь өнгөрөхгүй юм бол Таны хүсэл биелэг гэлээ.  

43 Дахин ирээд, тэдний нүд нь анилдсанаас унтсаныг харав.  

44 Тэр тэднийг дахин орхиж холдон яваад, гурав дахь удаагаа залбирч, нөгөө үгээ л хэлжээ.  

45 Тэгээд Тэр шавь нар дээрээ ирж,—Та нар унтаж, амарсаар л байна уу? Харагтун, цаг нь айсуй. Хүний Хүү нүгэлтнүүдийн гарт тушаагдаж байна.  

46 Бос, явцгаая. Харагтун, Намайг бариулагч айсуй гэлээ. 

 47 Түүнийг ийн ярьж байх зуур, үзэгтүн, арван хоёрын нэг буюу Иудас нь ахлах тахилч нар болон ард олны ахлагчдын явуулсан илд шийдэмтэй бөөн хүний хамт хүрч ирэв.  

48 Түүнээс урвасан нэгэн тэдэнд—Хэнийг би үнсэнэ, Тэр мөн. Түүнийг барь хэмээн дохио өгсөн байлаа.  

49 Тэр даруй Есүс уруу очиж «Амар байна уу, Рабби» гээд Түүнийг үнсэв.  

50 Есүс түүнд—Анд минь, чи яах гэж ирэв? гэлээ. Тэгээд тэд ирж, Есүсийг гараараа зууран авч баривчлав.  

51 Үзэгтүн, Есүстэй хамт байгсдын нэг нь гар сунган илдээ сугалаад, тэргүүн тахилчийн зарцыг цохиж, чихийг нь тас цавчжээ.  

52 Есүс түүнд—Илдээ хуйнд нь хий. Илд авагч бүхэн илдээр хөнөөгдөнө.  

53 Арван хоёр легионоос олон тэнгэрэлчийг одоо Надад илгээхийг Би Эцэгээсээ гуйж чадахгүй гэж чи бодож байна уу?  

54 Энэ нь болох ёстой гэсэн Бичвэр тэгвэл яаж биелэгдэх билээ? гэв.  

55 Тэр үед Есүс хурсан олонд—Та нар Намайг дээрэмчин барихтай адил санан, илд шийдэмтэй ирээ юү? Өдөр бүр та нартай сүмд сууж, зааж байхад минь та нар Намайг бариагүй.  

56 Харин энэ бүхэн нь эш үзүүлэгчдийн Бичвэр биелэгдэхийн тулд болов гэв. Тэгтэл шавь нар бүгд Түүнийг орхин зугтжээ. 

57 Есүсийг бариад тэргүүн тахилч Каиафт хүргэхэд хуулийн багш нар, ахлагчид цугласан байв.  

59 Ахлах тахилч нар болон Зөвлөл даяараа Есүсийг хөнөөхийн тулд Түүний эсрэг худал гэрчлэл хайсаар байлаа.  

60 Хэдийгээр олон хуурамч гэрч гарч ирсэн боловч тэд юу ч олсонгүй. Харин сүүлд нь хоёр хуурамч гэрч ирээд— 61 “Би Бурханы сүмийг устгаад, гурав хоногийн дотор дахин барьж чадна” гэж энэ хүн хэлж байсан гэв.  

62 Тэргүүн тахилч босож, Түүнд—Чамд хариулах юм алга уу? Чиний эсрэг эд нар юу гэрчилж байгаа юм бэ? гэлээ.  

63 Гэвч Есүс дуугүй байлаа. Тэгтэл тэргүүн тахилч Түүнд—Чамайг амьд Бурханаар тангараглуулж байна. Чи Бурханы Хүү, Христ мөн юм уу? Бидэнд хэлээч гэв.  

64 Есүс түүнд—Та ч өөрөө хэллээ. Харин Би та нарт хэлье. Та нар үүнээс хойш Хүний Хүүг Хүчит Нэгэний баруун талд заларч, тэнгэрийн үүлэн дээр ирэхийг харах болно гэж айлдав.  

65 Тэргүүн тахилч дээлээ хүү татан—Тэр Бурханыг доромжлов. Бидэнд өөр гэрчийн хэрэг байна уу? Үзэгтүн, та нар сая доромжлол сонслоо.  

66 Та нар юу гэж бодож байна? гэхэд тэд—Тэр үхэх ёстой гэцгээлээ.  

67 Тэд нүүр уруу нь нулимж, Түүнийг цохиж, зарим нь алгадаад— 68 Чамайг хэн цохисныг эш үзүүлээдэх, Христ ээ? гэцгээв. 

69 Петрийг гадаа хашаан дотор сууж байтал нэгэн шивэгчин түүнд ойртон ирээд—Чи ч бас Галилын Есүстэй байсан шүү дээ гэхэд  

70 тэр харин бүгдийн өмнө үгүйсгээд—Юу ярьж байгааг чинь би мэдэхгүй байна гэв.  

71 Петрийг хашааны хаалгаар гарахад өөр шивэгчин түүнийг хараад, тэнд байгсдад—Энэ, Назарын Есүстэй байсан гэж хэлэв.  

72 Тэр дахин үүнийг өчиглөн үгүйсгэж—Би энэ хүнийг танихгүй гэв.  

73 Тэгтэл удалгүй, тэнд байгсад ирээд—Чи гарцаагүй тэдний нэг мөн. Ярианаас чинь л илт байна гэлцэв.  

74 Петр хараал тавин тангараглаж—Би энэ хүнийг танихгүй гэлээ. Тэр мөчид тахиа донгодов.  

75 Тэгээд Петр «Тахиа донгодохоос өмнө чи Намайг гурвантаа үгүйсгэнэ» гэж айлдаж байсан Есүсийн үгийг санаад, гадагш гарч, гашуунаар уйлав. 

1 Өглөө эрт ахлах тахилч нар ба ард олны ахлагчид Есүсийг алуулахаар зөвлөлдөн,  

2 Түүнийг хүлж аваачаад захирагч Пилатад өгөв. 

3 Түүнээс урвасан Иудас Түүний яллагдсаныг хараад харуусаж, гучин мөнгөн зоосыг ахлах тахилчид болон ахлагчдад буцаан өгч 

 4 Би гэм зэмгүй цуснаас урваснаараа нүгэл үйлдлээ гэхэд тэд—Энэ бидэнд хамаагүй. Өөрөө мэд гэв.  

5 Иудас мөнгөн зоосыг сүм дотор чулуудаад, зайлан явж, өөрийгөө дүүжилжээ.  

6 Ахлах тахилч нар мөнгөн зоосыг авч—Энэ нь цусны үнэ тул үүнийг сүмийн эрдэнэсийн санд хийх нь ёс бус юм гэв.  

7 Тэд зөвлөлдөөд тэр мөнгөөр ваарчны талбайг худалдан авч, гаднынхныг тавьдаг газар болгов.  

8 Тиймээс тэр талбай энэ өдрийг хүртэл «Цуст талбай» хэмээгдэх болжээ.  

9 Тийнхүү эш үзүүлэгч Иеремиагаар хэлүүлсэн нь биелэгдсэн бөгөөд тэр «Израилийн хөвгүүдийн Түүнд тогтоосон үнэ, гучин мөнгөн зоосыг тэд авч,  

10 Эзэний надад айлдсан ёсоор ваарчны талбайг худалдан авав» гэж хэлсэн байжээ. 

11 Есүс захирагчийн өмнө зогсов. Захирагч Түүнээс—Та иудейчүүдийн Хаан мөн юм уу? гэж асуухад Есүс—Та ч хэлж байна гэв.  

12 Ахлах тахилч нар болон ахлагчдаар яллуулахдаа Тэр юу ч хариулсангүй. 13 Пилат Түүнд—Тэд ямар олон зүйл Таны эсрэг гэрчилж байгааг Та сонсохгүй байна уу? Гэхэд 

14 Тэр түүнд ганц ч үг хариулсангүйд захирагч ихэд гайхжээ. 

15 Захирагч баяраар ард олны хүсэлтээр нэг хоригдлыг суллаж заншсан байв.  

16 Тэр үед тэдэнд Бараб гэгч зард гарсан хоригдол байлаа.  

17 Тэгээд олныг цуглахад Пилат тэдэнд—Та нар хэнийг суллуулахыг надаас хүсэж байна? Барабыг уу эсвэл Христ гэгдэх Есүсийг үү? Гэлээ.  

18 Учир нь тэд атаархсандаа Түүнийг барьж өгснийг тэр мэдэж байлаа.  

19 Шүүх суудалд Пилатыг сууж байхад эхнэр нь түүнд 

—Тэр зөвт Хүнд юу ч бүү хий. Би урьд шөнө зүүдэндээ Түүнээс болж ихэд шаналав гэж хэлүүлжээ.  

20 Гэвч ахлах тахилч нар ба ахлагчид Барабын төлөө гуйж, харин Есүсийг хөнөөлгө хэмээн ард олныг ятгасан байлаа.  

21 Захирагч тэдэнд—Энэ хоёрын хэнийг нь суллуулмаар байна? гэхэд тэд—Барабыг гэцгээлээ.  

22 Пилат тэдэнд—Тэгвэл Христ гэгдэх Есүсийг би яах болж байна? гэсэнд бүгд—Түүнийг цовдол гэцгээв.  

23 Пилат—Яагаад? Тэр ямар муу юм хийсэн юм бэ? гэж асуусанд харин тэд—Түүнийг цовдол гэж улам ихээр хашхирч байлаа. Цовдлуулахыг Пилат зөвшөөрөв 

24 Пилат энэ нь яавч нэмэргүй, харин ч бүр үймээн самуун дэгдэж эхлэхийг хараад, ус авч, хурсан олны өмнө гараа угаан—Би энэ зөвт Хүний цусанд буруугүй. Өөрсдөө мэдтүгэй гэжээ.  

25 Тэгтэл бүх хүн—Түүний цус бидний ба үр хүүхдүүдийн маань дээр байг гэцгээв.  

26 Тэгээд тэр Барабыг тэдэнд суллан, Есүсийг ташуурдуулаад, цовдлуулахаар өгчээ. 

27 Тэгэхэд захирагчийн цэргүүд Есүсийг ордонд авчирч, Түүн уруу бүтэн анги цуглуулав.  

28 Тэд Түүнийг нүцгэлээд час улаан нөмрөг нөмөргөж, 

29 сундуугаар титэм сүлжин тэргүүн дээр нь тавьж, баруун гарт нь хулс атгуулжээ. Тэд өмнө нь сөгдөж—Иудейчүүдийн Хаанд мэндчилье гэж дооглон,  

30 Түүн уруу нулимж, хулсыг аваад тэргүүнийг нь цохиж гарав.  

31 Тэд Есүсийг дооглосны дараа Түүнээс нөмрөгийг тайлж, хувцсыг нь өмсгөв. Тэгээд Түүнийг цовдлохоор авч явлаа.  

32 Тэд гарч явахдаа Курений хүн Симон гэгчтэй тааралдаж, түүнийг албадаж Түүний загалмайг үүрүүлэв.  

33 Тэгээд тэд Гавалын газар гэсэн утгаар Голгота гэж дууддаг газарт хүрч ирээд,  

34 цөстэй хольсон дарсыг Түүнд уулгахаар өгөв. Тэр амссан ч уусангүй.  

35 Тэд Түүнийг цовдолсны дараа шавга хаяцгаан, хувцсыг нь хуваан авч,  

36 суугаад тэндээ Түүнийг харгалзаж байв.  

37 Тэд тэргүүн дээр нь «Энэ бол Есүс, иудейчүүдийн Хаан» гэж ялыг нь бичсэн пайз хадлаа. 

38 Тэгэхэд Түүнтэй хоёр дээрэмчин, нэг нь баруун, нөгөө нь зүүн талд нь цовдлуулав.  

39 Дэргэдүүр нь өнгөрөгсөд толгой сэгсрэн Түүнийг доромжилж 

40 Сүмийг нурааж, гурав хоногийн дотор барьдаг Чи Өөрийгөө авраач. Чи Бурханы Хүү мөн юм бол загалмайнаас буугаач гэцгээж байлаа.  

41 Ахлах тахилчид ч хуулийн багш нар болоод ахлагчдын хамт мөн адил элэглэн 

42 Тэр бусдыг аварсан ч Өөрийгөө аварч чадахгүй. Тэр бол Израилийн Хаан. Тэр одоо загалмайнаасаа бууг. Тэгвэл бид Түүнд итгэнэ.  

43 Тэр Бурханд найдаж байсан биз дээ. Бурхан Түүнийг таалдаг юм бол одоо л Түүнийг авраг. “Бурханы Хүү бол Би байгаа юм” гээд л байсан биз дээ гэцгээв.  

44 Хамт цовдлогдсон дээрэмчид ч Түүнийг бас доромжилжээ. 

 45 Зургадугаар цагаас есдүгээр цаг хүртэл нийт нутгийг харанхуй нөмрөв.  

46 Есдүгээр цагийн орчим Есүс чанга дуугаар—Ели, Ели, лема сабахтани? гэж хашхирлаа. Энэ нь «Бурхан минь, Бурхан минь, юунд Та Намайг орхив?» гэсэн үг аж.  

47 Тэнд зогсогсдын зарим нь сонсоод—Энэ Елиаг дуудаж байна гэв.  

48 Тэдний нэг нь тэр даруй гүйж, далайн хөвөн авч, цагаан цуу шингээгээд, хулсны үзүүрт торгоон Түүнд уулгахаар өглөө.  

49 Харин бусад нь—Елиа Түүнийг аврахаар ирэх эсэхийг харцгаая гэв.  

50 Есүс дахин чангаар хашхираад амьсгал хураав.  

51 Үзэгтүн, сүмийн хөшиг дээрээсээ доош хүртэл хоёр хэсэг болон цуурсан ба газар хөдлөн хад чулуу бут үсэрч,  

52 булш нээгдэн нойрссон олон ариун хүний биес амилуулагдаж,  

53 Есүсийн амиллын дараа булшнуудаас гарч, ариун хотод орж, олонд харагджээ.  

54 Зуутын дарга ба Есүсийг харгалзагсад газар хөдлөлт ба болж буй зүйлийг хараад, ихэд айн 

—Энэ үнэхээр Бурханы Хүү байжээ гэв. 

55 Есүст үйлчилж, Түүнийг Галилаас дагаж ирсэн олон эмэгтэй тэнд холоос харж байлаа.  

56 Тэдний дунд Магдалын Мариа болон Иаков, Иосеф хоёрын эх Мариа мөн Зебедеен хөвгүүдийн эх ч байв. 

57 Есүсийн шавь байсан Иосеф гэгч Ариматын нэгэн баян хүн орой нь хүрч ирлээ.  

58 Тэр хүн Пилатад бараалхаж, Есүсийн цогцсыг гуйхад Пилат өгөхийг тушаав.  

59 Иосеф цогцсыг аваад, цэвэр маалинган даавуунд ороож,  

60 хаданд ухаж хийсэн өөрийнхөө шинэ булшинд тавьж, бул чулуу өнхрүүлэн булшны үүдийг таглаад явжээ.  

61 Тэнд Магдалын Мариа болон нөгөө Мариа булшны эсрэг талд сууж байв.

15 Та нар Намайг хайрладаг бол тушаалуудыг минь сахь.  

16 Би Эцэгээс гуйхад Тэр та нарт өөр Туслагчийг өгнө. Тэр нь та нартай үүрд хамт байна.  

26 Харин Туслагч буюу Миний нэрээр Эцэгийн минь илгээх Ариун Сүнс та нарт бүгдийг заах бөгөөд та нарт хэлсэн бүгдийг минь сануулах болно.  

27 Амар амгаланг Би та нарт үлдээнэ. Амар амгалангаа Би та нарт өгнө. Ертөнцийн өгдгөөс өөрийг Би та нарт өгч байна. Өр зүрхээ бүү шаналга. Бүү түгшицгээ.  

62 Бэлтгэлийн өдрийн дараах өдөр ахлах тахилчид ба фарисайчууд Пилатынд цуглаад 

63 Эрхэм ээ, тэр мэхлэгч амьд байхдаа “Би гурав хоногийн дараа амилна” гэж хэлж байсныг бид санаж байна.  

64 Тиймээс шавь нар нь ирж, Түүнийг хулгайлаад, ард олонд “Тэр үхэгсдээс амилав” гэж хэлүүлэхгүйн тул гурав дахь өдөр нь хүртэл булшийг хамгаалахыг тушаагаач. Эс бөгөөс сүүлчийн мэхлэл нь эхнийхээсээ ч дор муу юм болно гэцгээлээ.  

65 Пилат тэдэнд 

—Харуул аваад яв, чадахаараа хамгаал гэв.  

66 Тэд харуултай явж, хадыг лацдаж булшийг хамгаалав. 

26 Харин Туслагч буюу Миний нэрээр Эцэгийн минь илгээх Ариун Сүнс та нарт бүгдийг заах бөгөөд та нарт хэлсэн бүгдийг минь сануулах болно.  

27 Амар амгаланг Би та нарт үлдээнэ. Амар амгалангаа Би та нарт өгнө. Ертөнцийн өгдгөөс өөрийг Би та нарт өгч байна. Өр зүрхээ бүү шаналга. Бүү түгшицгээ.  

1 Долоо хоногийн эхний өдөр, эрт харанхуй байхад Магдалын Мариа хадан булшин дээр очоод, булшнаас хадыг зайлуулсан байхыг харав.  

2 Тэгээд тэр, Симон Петр болон Есүсийн хайртай байсан нөгөө шавь дээр нь гүйн ирж тэдэнд—Тэд Эзэнийг булшнаас авчихжээ. Түүнийг тэд хаана тавьсныг бид мэдэхгүй гэв. 

3 Тиймээс Петр нөгөө шавийн хамт булш уруу гүйв.  

4 Тэд хоёул хамтдаа гүйсэн боловч нөгөөдөх нь Петрээс хурдан гүйж, булшинд түрүүлэн ирж  

5 тонгойж хараад, даавуу байхыг үзсэн боловч дотогш орсонгүй.  

6 Араас нь Симон Петр ч гүйж ирээд, булш уруу орж, маалинган даавуу болон  

7 толгойг нь ороож байсан даавууг харав. Даавуунууд байсан байрандаа эвхээтэй байжээ.  

8 Тэгээд, түрүүлэн ирсэн нөгөө шавь булшинд орж хараад итгэв.  

9 Учир нь Тэр үхэгсдээс амилах ёстой гэсэн Бичвэрийг тэд ойлгоогүй л байлаа. 

10 Ингээд шавь нар нь өөрсдийнхөндөө буцав.  

11 Харин Мариа булшны гадаа зогсоод уйлж байлаа. Тэр уйлсан чигээрээ булш уруу тонгойн хартал  

12 цагаан хувцастай хоёр тэнгэрэлч Есүсийн цогцсыг тавьж байсан газарт нэг нь толгойд, нөгөө нь хөл талд нь сууж байв.  

13 Тэд түүнд—Эмэгтэй, чи юунд уйлна вэ? гэсэнд тэр—Тэд Эзэнийг минь авчихсан байна. Тэд Түүнийг хаана тавьсныг би мэдэхгүй гэв.  

14 Тэр ингэж хэлээд эргэхдээ Есүсийн зогсож байхыг харсан боловч тэр нь Есүс байсныг таньсангүй.  

15 Есүс түүнд—Эмэгтэй, чи юунд уйлна вэ? Чи хэнийг хайна вэ? гэж асуув. Түүнийг цэцэрлэгч байна гэж бодоод тэр Түүнд—Эзэн, хэрэв та Түүнийг зөөсөн бол хаана тавьснаа надад хэлнэ үү? Би Түүнийг авах гэсэн юм гэв.  

16 Есүс—Мариа гэлээ. Мариа эргэнгүүтээ Түүнд еврейгээр—Рабуни! (Багш гэсэн утгатай) гэжээ.  

17 Есүс—Би Эцэгтээ хараахан дээш очоогүй байгаа тул Надад гар бүү хүр. Харин ах дүү нарт минь очиж, тэдэнд “Би Эцэгтээ буюу та нарын Эцэгт, Бурхандаа буюу та нарын Бурханд дээш очно” гэдгийг хэл гэлээ.  

18 Магдалын Мариа ирж, шавь нарт—Би Эзэнийг харлаа гээд, Есүсийн өөрт нь айлдсаныг тэдэнд хэлэв. 

20 Харин чухамдаа Христ үхэгсдээс амилуулагдсан бөгөөд нойрсогсдоос анхны үр жимс мөн.  

21 Учир нь үхэл нэг хүнээр ирсэн тул үхэгсдийн амилал мөн нэг хүнээр иржээ.  

22 Адам дотор бүгд үхдэгчлэн Христ дотор бүгд амьд болгогдоно.