Есүс Христ "Ертөнцийн гэрэл Би байгаа юм. Намайг дагадаг хүн харанхуй дотор явахгүй, харин амийн гэрэлтэй болно" (Иохан 8:12) гэж хэлсэн.

Энэ юу гэсэн үг вэ?

Есүс Христийг даруухнаар дагадаг хүн Түүний гэрлийг хүлээн авч, уг гэрлийг хуваалцдаг. Уг гэрэл нь түнэр харанхуйг арилгах хүртлээ нэмэгдсээр байх болно.

Энэ нь Аврагчаас хүч чадал, хүчтэй нөлөө цацардаг гэсэн үг юм. Энэ нь “сансрын хязгааргүй уудмыг дүүргэхийн тулд Бурханы дэргэдээс урагш гардаг” [Сургаал ба Гэрээ 88:12]. Энэ хүч гэгээрүүлж, урам зориг өгч, бидний амьдралыг гэрэлтүүлдэг учраас судрууд үүнийг ихэвчлэн гэрэл, түүнчлэн сүнс ба үнэн гэж нэрлэдэг. …

… Та нарыг тусламж хэрэгтэй хэн нэгнийг анзаарч, хайраар хүрч туслахаар тав тухаа золиослох бүрд [Бурханы] гэрэл өсөн нэмэгдэж байдаг. …

Бурханд төдийгүй бусдад үйлчлэх үед тэнгэрлэг гэрэл амьдралд чинь гэрэлтэж байсан хувийн туршлагуудаа бодоод үз. ... Тэр мөчүүдээ гэр бүл, найз нөхөд, ялангуяа гэрлийг эрэлхийлж буй өсвөр үеийнхэнтэй хуваалц. Энэ гэрэл хав харанхуй дэлхийд хүртэл найдвар, эдгээлт авчирдаг гэдгийг тэд та нараас сонсох хэрэгтэй.

Христийн гэрэл найдвар, аз жаргал, бүх төрлийн сүнслэг шарх, өвчин эмгэгийг эдгээх хүчийг авчирдаг [1 Иохан 1:7; Алма 7:11–13-ыг үзнэ үү]. Энэ цэвэршүүлэгч нөлөөг мэдэрсэн хүмүүс дэлхийн гэрэл болсон Түүний мутарт зэмсэг болж, бусдад гэрлийг түгээж чадна. (Дийтр Ф.Угдорф, “Тэнгэрлэг гэрэл түгээгчид” 2017 оны 10-р сарын Ерөнхий чуулган)

“Хүмүүс та нарын сайн үйлсийг хараад, тэнгэр дэх Эцэгийг чинь алдаршуулахын тулд та нарын гэрэл тэдний өмнө тийнхүү гэрэлтэг” (Матай 5:16). …

Дэлхий дээр ирсэн хүн нэг бүр Христийн гэрлийг хүлээн авсан. Бид Аврагчийн үлгэр жишээг дагаж, Түүний зааж мөн амьдарсны адил амьдарвал тэр гэрэл бидний дотор дүрэлзэж, бусдын замыг гэрэлтүүлэх болно. …

... Бидний нөлөөллийн хүрээнд ганцаардсан, өвчтэй, сэтгэлээр унасан хүмүүс байдаг. Бидний хувьд тэдэнд тусалж, сэтгэл санааг нь дээшлүүлэх боломж бий. Аврагч найдваргүй хүмүүст найдвар, сул дорой хүмүүст хүч чадал өгдөг. Тэр өвчтэй хүмүүсийг эдгээсэн; Тэрээр доголонг алхуулж, сохор хүмүүсийг хараа оруулж, дүлий хүмүүсийг сонсдог болгосон. Тэр үхэгсдийг хүртэл амилуулсан. Тохинууллынхаа турш Тэрээр тусламж хэрэгтэй хүн бүрт энэрэл хайраар ханддаг байсан. Бид Түүний үлгэр жишээг даган өөр бусдыг төдийгүй өөрсдийнхөө амьдралыг адислах болно. ...

... Бид ямар ч нөхцөлд байсан өдөр бүр гэрэлтэх боломжууд биднийг тойрон хүрээлж байдаг. Бид Аврагчийн үлгэр жишээг дагаснаар бид гэр бүлийн гишүүд, найз нөхөд, хамт ажиллагсад, жирийн нэгэн танилууд эсвэл огт танихгүй ч бай бусдын амьдралд гэрэл нь байх боломжтой. ...

“Ертөнцийн гэрэл бол би байгаа юм: Намайг дагадаг хүн харанхуй дотор явахгүй, харин амийн гэрэлтэй болно” (Иохан 8:12) гэсэн Аврагчийн үг хичнээн ихээр тайтгаруулдаг вэ. (Томас С.Монсон, “Be an Example and a Light,” Лиахона, 2015 оны 11-р сар)

Аврагч "Болгоогтун би бол гэрэл; би та нарт үлгэр жишээ үзүүлсэн билээ” [3 Нифай 18:16] хэмээн гэрчилсэн. Түүний жишээнүүдээс нэгийг авч үзье.

Худгийн дэргэд байсан эмэгтэй самари хүн байсан бөгөөд Есүс Христийг таньдаггүй, бас нийгэмд нь зарим хүн түүнийг гадуурхдаг байжээ. Есүс түүнтэй уулзаж, яриа өрнүүлэн, эхлээд тэд усны тухай ярилцсан. Тэгээд Тэрээр Өөрийгөө “амийн ус” хэмээн зарлаж, түүнийг илүү их гэрэлд авчирсан [Иохан 4:9–30-ыг үзнэ үү].

Та бидэнд яг одоо хуваалцахад хүрэлцээтэй гэрэл бий. ... "Би гэрлээрээ хэрэгтэй замаа олж харахад нь хэнд тусалж чадах вэ?" гэж өөрөөсөө асуу. …

... Бид тэдэнд тусалж чадна. Бид бусдад харуулахын тулд зориудаар гэрлээ туяаран гийгүүлж чадна. Бид тэднийг урьж чадна. Христийн зүг эргэлзээд ч гэсэн нэг алхам урагшилж байгаа хүмүүстэй бид хамт алхаж чадна. …

… Ийм оролдлогуудыг хийхдээ бид тав тухтай байдлаа орхих хэрэгтэй болж магадгүй. Гэсэн ч гэрэл маань туяаран гийхэд Их Эзэн туслах болно гэдэгт итгэлтэй байгаарай. (Бонни Х.Кордон, “Тэд харж болохын тулд,” Ensign эсвэл Лиахона, 2020 оны 5-р сар)

Христ тэр эмэгтэйг болон түүнд юу хэрэгтэй байсныг сайн мэдэж байв. Тэр эмэгтэйн байсан газар нь очиж, түүний мэдэх энгийн зүйлийн талаар ярьж эхэлсэн. Тэгээд Тэр яриагаа үүгээр дуусгасан бол энэ нь эерэг уулзалт байх байв. Хэрэв тэгсэн бол тэр эмэгтэй хот руу явж, "Ирж, үзэгтүн. Тэр Христ биш үү?" гэж зарлахгүй байх байсан. [Иохан 4:29]. Ярилцаж байхдаа тэрээр Есүс Христийн талаар мэдэж авсан бөгөөд өнгөрснөөсөө үл хамааран гэрэлт зэмсэг болж, бусдын замыг гэрэлтүүлсэн юм. ...